Get Adobe Flash player

ໜ່ວຍຮາກຖານຊາວໜຸ່ມ ສານປະຊາຊົນແຂວງ ສາລະວັນ ເປີດກອງປະຊຸມໃຫຍ່ ຄັ້ງທີ II

ເພື່ອປະຕິບັດຕາມກົດລະບຽບຂອງ ຄະນະຊາວໜູ່ມ ປະຊາຊົນ ປະຕິວັດລາວ ສະໄໝທີVIIໃນໝວດທີ V ມາດຕາ 24 ວ່າດ້ວຍກອງປະຊຸມໃຫຍ່ໃນເຊົ້າຂອງວັນທີ 28 ກຸມພາ 2019 ຜ່ານມານີ້ໜ່ວຍຮາກຖານຊາວໜຸ່ມ ສານປະຊາຊົນແຂວງ ສາລະວັນ ກໍ່ໄດ້ເປີດກອງປະຊຸມໃຫ່ຍ ຄັ້ງທີ II

ຂື້ນຢູ່ທີ່ຫ້ອງປະຊຸມຂອງ ສານປະຊາຊົນ ແຂວງສາລະວັນ ພາຍໃຕ້ການເປັນປະທານຂອງ ທ່ານ ສົມພູ ສະວົງລຽນຄຳ ເລຂາໜ່ວຍຮາກຖານຊາວໜຸ່ມສານປະຊາຊົນ ແຂວງ, ເປັນກຽດເຂົ້າຮ່ວມມີ  ທ່ານ  ຈັນສີລອນ ສີສົມບູນ ກໍາມະການພັກແຂວງ,ກຳມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ, ມີທ່ານ ຈຳປາ ສຸດທະວົງ ຄະນະໜ່ວຍພັກ ສານປະຊາຊົນ ແຂວງ, ພ້ອມດ້ວຍແຂກຖືກເຊີນ ແລະ ສະມາຊິກຊາວໜຸ່ມເຂົ້າຮ່ວມທັງໝົດ 35 ທ່ານ, ຍິງ 15 ທ່ານ.

          ກອງປະຊຸມໄດ້ຮັບຟັງການຜ່ານບົດລາຍງານການເມືອງໄລຍະ 3 ປີ ແລະ ທິດທາງແຜນການ 2019 - 2023 ສະເໜີໂດຍ: ທ່ານ ສົງກາ ຄ່ຽມມະນີຂັນໄຊຮອງເລຂາໜ່ວຍຮາກຖານຊາວໜຸ່ມສານປະຊາຊົນ ແຂວງ, ພາຍໃນໜ່ວຍມີສະມາຊິກຊາວໜຸ່ມທັງໝົດ 24ຄົນ, ຍິງ11ຄົນ, ພາຍໃນໜ່ວຍມີກອງທຶນທັງໝົດ 500.000ກີບ. ຜ່ານການຈັດຕັ້ງປະຕິບັດວຽກງານໄລຍະ 3 ປີ ສະມາຊິກຊາວໜຸ່ມມີຄວາມເປັນເອກະພາບສູງໃນການຈັດຕັ້ງເຄື່ອນໄຫວວຽກງານຊາວໜຸ່ມ 4 ບຸກ ໂດຍຖືເອົາການສຶກສາອົບຮົມການເມືອງ-ແນວຄິດເປັນຫຼັກເຫັນວ່າສະມາຊິກພາຍໃນໜ່ວຍມີທັດສະນະຫຼັກໝັ້ນຕໍ່ຄຸນທາດການເມືອງ ເຊື່ອໝັ້ນຕໍ່ການນຳພາຂອງພັກຢ່າງຕາຍໃຈ ມີຄວາມຮັບຜິດຊອບສູງເປັນເຈົ້າການໃນການຈັດຕັ້ງປະຕິບັດຜັນຂະຫຍາຍມະຕິຄຳສັ່ງຂອງພັກ-ລັດ ເປັນເຈົ້າການຊອກຮູ້ຮ່ຳຮຽນຍົກລະດັບຄວາມສາມາດໃຫ້ສູງຂື້ນ ເປັນເຈົ້າການຕົນເອງມີນຳໃຈຮັກຊາດອັນດູດດື່ມຮູ້ນຳໃຊ້ສິດ ແລະ ປະຕິບັດພັນທະຢ່າງຖຶກຕ້ອງຄົບຖ້ວນ ພາຍໃນໜ່ວຍກໍ່ໄດ້ມີການສຳຫຼວດກວດກາປະຈຳເດືອນ ເພື່ອຮ່ວມຊີວິດການເມືອງ ສ່ອງແສງລາຍງານການເຄື່ອນໄຫວເພື່ອຕຳນິສົ່ງຂ່າວກໍ່ສ້າງເຊິ່ງກັນ ແລະ ກັນ, ການປັບປຸງການຈັດຕັ້ງໃນໄລຍະ 3 ປີ ຜ່ານມາຄະນະຮາກຖານຊາວໜຸ່ມຂອງພວກເຮົາກໍ່ໄດ້ສຸມຈິດສຸມໃຈ ແລະ ປັບປຸງການຈັດຕັ້ງກໍ່ໄດ້ມີການຈັດແບ່ງຄວາມຮັບຜິດຊອບໃຫ້ບັນດາຫາຍໃນຄະນະຮາກຖານຊາວໜຸ່ມ ແລະ ວຽກງານຂະບວນການກໍ່ຄືແຜນພັດທະນາຊາວໜຸ່ມ-ເຍົາວະຊົນຢ່າງຕັ້ງໜ້າ ເຊິ່ງຕີລາຄາໃຫ້ເຫັນວ່າ: ສະມາຊິກຊາວໜຸ່ມສາມາດຍາດໄດ້ໃບຍ້ອງຍໍຂັ້ນຄະນະຊາວໜຸ່ມແຂວງ27ທ່ານ, ຍິງ12ທ່ານ ແລະ ໄດ້ຮັບໃບຍ້ອງຍໍຂັ້ນໜ່ວຍ 1 ໃບ ຈາກຄະນະບໍລິຫານງານຊາວໜຸ່ມແຂວງ. ຈາກນັ້ນກອງປະຊຸມກໍ່ໄດ້ປ່ອນບັດຄັດເລືອກເອົາຄະນະໜ່ວຍຊຸດໃໝ່ ເຊິ່ງມີຜູ້ສະໝັກໃນຄັ້ງນີ້ 5 , ຍິງ 1 ທ່ານ, ເລືອກເອົາ 3 ທ່ານ. ເພື່ອເຂົ້າມາຮັບຜິດຊອບຊີ້ນໍາ-ນໍາພາສະມາຊິກຊາວໜຸ່ມເຄື່ອນໄຫວວຽກງານໃນຕໍ່ໜ້າໃຫ້ຕໍ່ເນື່ອງຜົນຂອງກອງປະຊຸມຄັ້ງປະຖົມມະລຶກຕົກລົງແຕ່ງຕັ້ງເອົາ ທ່ານ ສົງກາ ຄ່ຽມມະນີຂັນໄຊເປັນເລຂາ, ທ່ານ ສະເຫຼີມໄຊ ຄຳພູມີເປັນຮອງເລຂາ,ທ່ານ ວິໄລພອນ ຄຳນີນ ເປັນຄະນະ.ທັງເປັນປະທານກວດກາ

ໃນຕອນທ້າຍຂອງກອງປະຊຸມຍັງໄດ້ຮັບຟັງຄໍາໂອ້ລົມ ຊີ້ທິດເຍືອງທາງຂອງທ່ານຈັນສີລອນ ສີສົມບູນ ເພິ່ນໄດ້ມີບາງທັດສະນະ​ຄື:

ຄະນະຊາວໜຸ່ມຕ້ອງເຂົ້າໃຈເຖິງພະລະບົດບາດ ແລະ ໜ້າທີ່ຂອງແຕ່ລະສະຫາຍເພື່ອນໍາໄປຈັດຕັ້ງປະຕິບັດໃນຕໍ່ໜ້າ,ມີຄວາມຫ້າວຫັນ ບຸກບືນເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກຊາວໜຸ່ມໃຫ້ມີຄວາມໜັກແໜ້ນເຂັ້ມແຂງ,ເອົາໃຈໃສ່ຝຶກຜົນຫຼໍ່ຫຼອມຕົນເອງໃຫ້ມີຄວາມຮູ້ ຄວາມສາມາດເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ.

ເອົາໃຈໃສ່ເປັນຢ່າງສູງໃນວຽກງານການເມືອງແນວຄິດ ແລະ ປັບປຸງການຈັດຕັ້ງຕາມແນວທາງຂອງພັກໃນການຈັດຕັ້ງບົນພື້ນຖານລະບຽບການຂອງລັດ, ປັບປຸງແບບແຜນການນຳພາວຽກງານການຈັດຕັ້ງໃຫ້ເຂັ້ມແຂງຂື້້ນເລື້ອຍໆ.

ກອງປະຊຸມໄດ້ດຳເນີນມາເປັນເວລາ 1 ຄາບກໍ່ໄດ້ປິດລົງ