Get Adobe Flash player

ໜ່ວຍຮາກຖານຊາວໜຸ່ມ ທະນາຄານພັດທະນາລາວສາຂາ ແຂວງສາລະວັນ ເປີດກອງປະຊຸມໃຫຍ່ ຄັ້ງທີ IV

ເພື່ອປະຕິບັດຕາມກົດລະບຽບຂອງ ຄະນະຊາວໜູ່ມ ປະຊາຊົນ ປະຕິວັດລາວ ສະໄໝທີ VIIໃນໝວດທີ V ມາດຕາ 24 ວ່າດ້ວຍກອງປະຊຸມໃຫຍ່ໃນເຊົ້າຂອງວັນທີ 10 ພຶດສະພາ 2019 ຜ່ານມານີ້ ໜ່ວຍຮາກຖານຊາວໜຸ່ມ ທະນາຄານພັດທະນາລາວສາຂາ ແຂວງສາລະວັນ

ກໍ່ໄດ້ເປີດກອງປະຊຸມໃຫ່ຍ ຄັ້ງທີIVຂື້ນຢູ່ທີ່ຫ້ອງປະຊຸມຂອງ ທະນາຄານພັດທະນາລາວ ແຂວງສາລະວັນ ພາຍໃຕ້ການເປັນປະທານຂອງ  ທ່ານ ພູທອນ ຫອມສົມບັດ ເລຂາໜ່ວຍຮາກຖານຊາວໜຸ່ມທະນາຄານພັດທະນາລາວແຂວງ, ເປັນກຽດເຂົ້າຮ່ວມມີ ທ່ານ ຈັນສີລອນ ສີສົມບູນ ກໍາມະການພັກແຂວງ,ກຳມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ, ມີທ່ານ ຄຳພູວັນ ບຸບຜາວັນ ຮອງເລຂາໜ່ວຍພັກ, ຮອງຫົວໜ້າທະນາຄານພັດທະນາລາວສາຂາແຂວງ, ແຂວງສາລະວັນພ້ອມດ້ວຍແຂກຖືກເຊີນ ແລະ ສະມາຊິກຊາວໜຸ່ມເຂົ້າຮ່ວມທັງໝົດ 26 ທ່ານ, ຍິງ 13 ທ່ານ.

          ກອງປະຊຸມໄດ້ຮັບຟັງການຜ່ານບົດລາຍງານການເມືອງໄລຍະ 3 ປີ ແລະ ທິດທາງແຜນການ 2018 - 2023 ສະເໜີໂດຍ: ທ່ານ ຄຳພຽນພູມະນີບົດ ຮອງເລຂາໜ່ວຍຮາກຖານຊາວໜຸ່ມ ທະນາຄານພັດທະນາລາວແຂວງ, ພາຍໃນໜ່ວຍມີສະມາຊິກຊາວໜຸ່ມທັງໝົດ 5ຄົນ, ຍິງ7ຄົນ, ຜ່ານການຈັດຕັ້ງປະຕິບັດວຽກງານໄລຍະ 3 ປີ ສະມາຊິກຊາວໜຸ່ມມີຄວາມເປັນເອກະພາບສູງໃນການຈັດຕັ້ງເຄື່ອນໄຫວວຽກງານຊາວໜຸ່ມ 4 ບຸກ ຈົນສາມາດຍາດໄດ້ໜ່ວຍຕົວແບບ 4 ບຸກໂດຍຖືເອົາການສຶກສາອົບຮົມການເມືອງ-ແນວຄິດເປັນຫຼັກເຫັນວ່າສະມາຊິກພາຍໃນໜ່ວຍມີທັດສະນະຫຼັກໝັ້ນຕໍ່ຄຸນທາການເມືອງ ເຊື່ອໝັ້ນຕໍ່ການນຳພາຂອງພັກຢ່າງຕາຍໃຈ ມີຄວາມຮັບຜິດຊອບສູງເປັນເຈົ້າການໃນການຈັດຕັ້ງປະຕິບັດຜັນຂະຫຍາຍມະຕິຄຳສັ່ງຂອງພັກ-ລັດ ເປັນເຈົ້າການຊອກຮູ້ຮ່ຳຮຽນຍົກລະດັບຄວາມສາມາດໃຫ້ສູງຂື້ນ ເປັນເຈົ້າການຕົນເອງມີນຳໃຈຮັກຊາດອັນດູດດື່ມຮູ້ນຳໃຊ້ສິດ ແລະ ປະຕິບັດພັນທະຢ່າງຖຶກຕ້ອງຄົບຖ້ວນ ພາຍໃນໜ່ວຍກໍ່ໄດ້ມີການສຳຫຼວດກວດກາປະຈຳເດືອນ ເພື່ອຮ່ວມຊີວິດການເມືອງ ສ່ອງແສງລາຍງານການເຄື່ອນໄຫວເພື່ອຕຳນິສົ່ງຂ່າວກໍ່ສ້າງເຊິ່ງກັນ ແລະ ກັນ, ການປັບປຸງການຈັດຕັ້ງໃນໄລຍະ 3 ປີ ຜ່ານມາຄະນະຮາກຖານຊາວໜຸ່ມຂອງພວກເຮົາກໍ່ໄດ້ສຸມຈິດສຸມໃຈ ແລະ ປັບປຸງການຈັດຕັ້ງກໍ່ໄດ້ມີການຈັດແບ່ງຄວາມຮັບຜິດຊອບໃຫ້ບັນດາຫາຍໃນຄະນະຮາກຖານຊາວໜຸ່ມ ແລະ ວຽກງານຂະບວນການກໍ່ຄືແຜນພັດທະນາຊາວໜຸ່ມ-ເຍົາວະຊົນຢ່າງຕັ້ງໜ້າ ເຊິ່ງຕີລາຄາໃຫ້ເຫັນວ່າ: ສະມາຊິກຊາວໜຸ່ມສາມາດຍາດໄດ້ໃບຍ້ອງຍໍຂັ້ນຄະນະຊາວໜຸ່ມແຂວງ15ທ່ານ, ຍິງ9ທ່ານ. ກອງປະຊຸມກໍ່ໄດ້ປ່ອນບັດຄັດເລືອກເອົາຄະນະໜ່ວຍຊຸດໃໝ່ ເຊິ່ງມີຜູ້ສະໝັກໃນຄັ້ງນີ້ 5ທ່ານ, ຍິງ1ທ່ານ, ເລືອກເອົາ3ທ່ານ. ເພື່ອເຂົ້າມາຮັບຜິດຊອບຊີ້ນໍາ-ນໍາພາສະມາຊິກຊາວໜຸ່ມເຄື່ອນໄຫວວຽກງານໃນຕໍ່ໜ້າໃຫ້ຕໍ່ເນື່ອງຜົນຂອງກອງປະຊຸມຄັ້ງປະຖົມມະລຶກຕົກລົງແຕ່ງຕັ້ງເອົາ ທ່ານ ຄຳພຽນ ພູມະນີບົດ ເປັນເລຂາ, ທ່ານ ນ. ວິໄລສິດ ເທບວົງສາ ເປັນຮອງເລຂາ, ທັງເປັນປະທານກວດກາ, ທ່ານ ເພັດດາວັນ ບຸບຜາວັນ ເປັນຮອງເລຂາທັງເປັນປະທານກວດກາ .

     ໃນຕອນທ້າຍຂອງກອງປະຊຸມຍັງໄດ້ຮັບຟັງຄໍາໂອ້ລົມ ຊີ້ທິດເຍືອງທາງຂອງທ່ານຈັນສີລອນ ສີສົມບູນ ເພິ່ນໄດ້ມີບາງທັດສະນະ​ຄື:

ຄະນະຊາວໜຸ່ມຕ້ອງເຂົ້າໃຈເຖິງພະລະບົດບາດ ແລະ ໜ້າທີ່ຂອງແຕ່ລະສະຫາຍເພື່ອນໍາໄປຈັດຕັ້ງປະຕິບັດໃນຕໍ່ໜ້າ,ມີຄວາມຫ້າວຫັນ ບຸກບືນເອົາໃຈໃສ່ສຶກສາ ອົບຮົມການເມືອງແນວຄິດໃຫ້ສະມາຊິກຊາວໜຸ່ມໃຫ້ມີຄວາມໜັກແໜ້ນເຂັ້ມແຂງ,ເອົາໃຈໃສ່ຝຶກຜົນຫຼໍ່ຫຼອມຕົນເອງໃຫ້ມີຄວາມຮູ້ ຄວາມສາມາດເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ.

ເອົາໃຈໃສ່ເປັນຢ່າງສູງໃນວຽກງານການເມືອງແນວຄິດ ແລະ ປັບປຸງການຈັດຕັ້ງຕາມແນວທາງຂອງພັກໃນການຈັດຕັ້ງບົນພື້ນຖານລະບຽບການຂອງລັດ, ປັບປຸງແບບແຜນການນຳພາວຽກງານການຈັດຕັ້ງໃຫ້ເຂັ້ມແຂງຂື້້ນເລື້ອຍໆ.

ກອງ​ປະຊຸ​ມ​ໄດ້​ໃຊ້​ເວລາ​ໃນ​ການ​ດຳ​ເນີນ 1 ຄາບ ​ແລ້ວກໍ່ປິດ​ລົງ​ຢ່າງ​ເປັນ​ທາງ​ການ.